يا ليت أن الزمان يرجع ورى والليالي تدور..
ويرجع وقتنا الأول ننعم في بساطتنا..

زمان أول أحس أنه زمان صادق فيه شعور..
نحب ونخلص النية وتجمعنا محبتنا..

زمان ما فيه لا غيبة ولا حتى خيانة ونفاق وزور..
يا ليته بس يرجع و نسترجع طفولتـــــنا..

صغار وقلوبنا بيضاء..ونعيش بعالم محصور..

ولا نعرف ابد أغراب ما غير عيال حارتنا..
صحيح صغار بالتفكير ولكن ما علينا قصور..

نخطط نكسر اللعبة وتسعدنا شقاوتنا..
نروح للمدرسة بدري ونضحك داخل الطابور ..

نحاول نزعج العالم بروحتنا و جيتنا..
وعشان نأخر الحصة نخبي علبة الطبشور..

نشاغب بس بالأخر تميزنا براءتنا..
نحب الضحك والهيصة..
نحب أنط فوق السور..

نفرفش ليه ما نفرفش ما دام الضحك عادتنا..
ولكن دارت الأيام وبان الخافي المستور..

وصار الهم متعلي على قمة سعادتنا..
كبرنا وصارت الدنيا تصف أحزاننا بالدور..

وتهدينا الألم والهم غصب عن عين رغبتنا..
تعبنا من بلاوينا احد ضايق واحد مقهور..

وكلن غارق بهمه وفي الآخر تشتتنا..
وأنا ما أقول غير ألا يا ليت أن الزمان يدور..
ويرجع للورى فترة نعدل وضع عيشتنا..

إن شاء الله تعجبكم القصيدة وماتكون مكررة
تحيآتي لكم