خبرني يا بيت جدي الله يرحم اللي بناك
كيف حالتك بعدي والا الزمان نساك
فاكر يا بيت جدي؟ كيف كنت انا وياك
لما كنت انا لوحدي اسهر ليالي معاك
*******************************
وخبرني يا بيت جدي مين بيرش لك الحوش ؟
وقلي من بعد خيرك ومين يسوي الشاي بالدوش ؟
ومين يبخر شرابك؟ ومين يلمع الشربوش؟
ومين يرخم الدهليز؟ اللي بأيام الصبا منقوش
واخبار مبيتك ايه؟ اللي بالفرح مفروش
وليل الناموسية كيف؟ وطرفها اللي كان مخشوش
ومين بيقزقز الترمس ؟ ومين بيقرمط المنقوش؟
ومين يوقف على بابك؟ يستنى الثلاثة قروش؟
وخبرني يا بيت جدي كيف حال جدرانك؟
كيف مقعدك يا بيت؟ وايش اخبار ديوانك
والله وحشتني بالحيل وحشتني صرير بيبانك
وحشتني الرسلة والزنبيل واسيابك و روشانك
وحشتني دعسة السقا على اعتاب درجانك
وحشني النمنم ابو ذيل وبساسك وفيرانك
وحشتني اشجار النيم ومرافعك و زيرانك
وحشتني كومة البرسيم ودجاجك و قفصانك
********************
أيام راحت يا بيت جدي في كل ركن هنا حكايه
هنا قنعه هنا بيشة هناجامة هنا ملايه
هنا كانت مدورات ستي ومحارمها ومصلايه
هنا الكوبر والسيسم الخشبي ومشقره قديمة ومرايه
هنا كان كمر جدي وبسطونه وتكاية
هنا برج عمته الحلبي وهنا كوفيه منشاية
هنا كان بيت القرآن وهنا كنا معلقين آيه
هنا بيت المرواح كان وطراريح بدقديق مغطاية
هنا مكوه ام الفحم وموية بخ في كباية
هنا سموار و بنت منقل وبخور في صرة مخباية
هنا شربة دورق بالزمزم مملايه
هنا مغراف هنا شربة بريحة الخير مندايه
هنا نعناع هنا فوفل وشامي ولامي وسكاية
هنا كان المركب فوق صحون رايحة وصحون جاية
هنا خرقة هنا صندوق و قفه من السقف مدلايه
هنا بيت البسة حتى العيش هنا نحسان مكفاية
هنا بيت الملاعق كان وكومة رز منقاية
هنا بكرج هنا كفكير هنا منخل ومصفاية
هنا غريبة ومعمول وهنا كنافة مسقاية
وبخاخة وطباخة وتنكة قاز معباية
هنا تطبخ لنا ستي بايدها الحلوة المحناية
كده كنا هنا عايشين قصة حب بلا نهاية
هنا اتعلمنا احترام الشيب ونسوي كلمة الكبير
